Get Adobe Flash player

postheadericon Рӯзҳои фарҳангии Ҷумҳурии Тоҷикистон дар Туркманистон

14 июни соли 2017 дар толори пуршукуҳи Қасри мақомҳои Маркази давлатии фарҳангии Туркманистон маросими ботантанаи ифтитоҳи Рӯзҳои фарҳанги Ҷумҳурии Тоҷикистон дар Туркманистон ба вуқӯъ пайваст.

Сараввал, муовини Вазири фарҳанги Туркманистон Абдиева Баҳоргул Қурбонмуродовна ва муовини Вазири фарҳанги Ҷумҳурии Тоҷикистон Давлатзода Зевар Маҳмудӣ аҳли толорро ба шарафи Рӯзҳои фарҳангии Ҷумҳурии Тоҷикистон дар Туркманистон шодбош гуфта, оид ба паҳлуҳои гуногуни ҳамкориҳо ва густариши онҳо андеша ронданд.

Сипас, барномаи рангини ҳунарпешагони маъруфи тоҷик манзури беш аз ҳазор нафар шахсиятҳои мӯътабари фарҳанг, санъат, адабиёт, корпуси дипломатии муқими Туркманистон ва шаҳрвандони Туркманистон гардонда шуд.

Рақсҳои дилошӯби гулдухтарони ансамбли рақсии Филармонияи давлатии Тоҷикистон, сурудҳои замонавӣ, классикӣ ва таронаҳои халқии овозхонҳои машҳур Шарофат Усмонова, Хуршед Иброҳимов, Парвин Юсуфӣ, Парвин Маҳмадёрова, Бахтиёр Баёнӣ ва ҳунари доиранавозу карнайкашон ҳозиринро ба ваҷд оварданд.

Қаблан дар Вазорати фарҳанги Туркманистон муовини Вазири фарҳанги Туркманистон Абдиева Баҳоргул роҳбари ҳайати расмӣ, муовини Вазири фарҳанги Ҷумҳурии Тоҷикистон Давлатзода Зевар Маҳмудиро ба ҳузур пазируфта, атрофи робитаҳои дуҷониба, таҳияи лоиҳаи Созишномаи нави ҳамкорӣ дар соҳаи фарҳанг ва санъат, муҳлати баргузории Рӯзҳои фарҳанги Туркманистон дар Ҷумҳурии Тоҷикистон табодули афкор намуданд.

 

postheadericon Суҳбати телефонии сарони давлатҳои Тоҷикистон ва Россия бо Президенти Туркманистон

Субҳи 28 феврали соли 2017 дар шаҳри Душанбе Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Федератсияи Россия Владимир Путин бо Президенти Туркманистон Гурбонгулӣ Бердимуҳамедов суҳбати телефонӣ анҷом доданд.

Зимни гуфтугӯи судманди телефонӣ Президенти Ҷумҳурии Тоҷикистон муҳтарам Эмомалӣ Раҳмон ва Президенти Туркманистон Гурбонгулӣ Бердимуҳамедов вазъи кунунӣ ва дурнамои муносибатҳои байнидавлатиро мавриди баррасӣ қарор дода, барои рушду тавсеаи бештару хубтари онҳо дар ҳамаи соҳаҳои афзалиятнок изҳори омодагию ҳавасмандӣ зоҳир намуданд.

Дар суҳбати телефонӣ ҳамчунин масоили вобаста ба ҳамкориҳои минтақавию байналмилалии Тоҷикистону Туркманистон мавриди баррасӣ қарор дода шуд.

 

postheadericon Анҷоми сафари расмии Президенти Федератсияи Россия Владимир Путин ба Ҷумҳурии Тоҷикистон

Субҳи 28 феврали соли 2017 дар ҳошияи сафари расмии Президенти Федератсияи Россия ба Ҷумҳурии Тоҷикистон мулоқоти хосса ва дӯстонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Федератсияи Россия Владимир Путин баргузор шуд.

Дар сӯҳбати самимӣ сарони давлатҳо масоили марбут ба натиҷаҳои сафар ва роҳу усулҳои тадбиқи мувофиқаҳои бадастомадаро мавриди баррасӣ қарор дода, доир ба муҳимияти иҷрои санадҳои нави ҳамкорӣ фикру мулоҳизаҳои судманд баён намуданд.

Бо ҳамин сафари расмии Президенти Федератсияи Россия Владимир Путин ба Ҷумҳурии Тоҷикистон анҷом ёфт.

Дар Фурудгоҳи байналмилалии Душанбе меҳмони олиқадрро Президенти Ҷумҳурии Тоҷикистон муҳтарам Эмомалӣ Раҳмон гусел намуданд.

Хотиррасон мешавем, ки сафари расмии Президенти Федератсияи Россия ба Ҷумҳурии Тоҷикистон, ки дар рӯзҳои 25-солагии барқароршавии муносибатҳои дипломатии ду давлат дар таърихи 27-28 феврали соли 2017 ҷараён гирифт, бо натиҷаҳои пурарзиш барои ҳар ду ҷониб ба охир расид.

Дар доираи ин сафар дидору вохӯрии хосаи Сарвари давлати Тоҷикистон муҳтарам Эмомалӣ Раҳмон бо Президенти Федератсияи Россия Владимир Путин ва мулоқоту музокироти сатҳи баланди байнидавлатӣ баргузор шуда 6 санади нави ҳамкорӣ ба имзо расид, ки муносибатҳои дӯстонаи Тоҷикистону Россияро дар соҳаҳои алоқа, меҳнат ва шуғли аҳолӣ, истифодаи энергияи атом бо мақсадҳои осоишта, сайёҳӣ ва тарбияи ҷисмонӣ такони тоза бахшида, ба тақвияти бештари ҳамкории Вазорати корҳои хориҷии Ҷумҳурии Тоҷикистон ва Вазорати корҳои хориҷии Федератсияи Россияро дар соли 2017 мусоидат менамояд.